أخبار_عالريق 179 ✅يكتبها/سعيد الطويل
 

#أخبار_عالريق 179
✅يكتبها/سعيد الطويل
■وضع الكورونا بغزة قلب جد ،وفش مجال للاستهتار والمسخرة
■صار عنا خمسين حالة كورونا بغزة وهذا العدد مكانش متوقع واحنا كنا مفكرينها سبهللة .
■ ع قولة أبو خالد ،غزة بتتحملش مزحة وبتلقب جد ،فما بالك الكورورنا .
■الجوامع اليوم حتكون فاتحة ،وفي كمامات حتتوزع ع باب الجامع وتاخذوش الولاد الصغار معاكم.
■ع فكرة الفتوى لسة ضايلة زي مهيا الرخصة مسموحة تصلوا في رحالكم ،يعني لو بدك تحافظ ع بيتك واولادك توكل ع الله .
■سوق جباليا سيطر ع سوق النصيرات بالزحمة والبسطات.
■الصحة العالمية بجلالة قدرها يخوي صرحت عشان غزة وقالت انه: الزحمة بأسواق غزة والجوامع حتساهم في انتشار الكورونا بصورة كبيرة.
■الدكتور مجدي ضهير بيقلك انه هذا الأسبوع هو الأخطر ع غزة من يوم اكتشاف الكورونا .
■الرئيس أبو مازن قال لحسين الشيخ اته يبلغ بشكل رسمي اليهود بقطع كل الاتصالات الرسمية والمش رسمية معاهم.
■نتنياهو زي مهوا متيسة معه ومتنمرد وبيقلك الهامل انه القدس حتضب عاصمتهم الموحدة وعلى هذا الأساس مستعد للمفاوضات غير هيك لا.
■7.ماس بتقلكم انها جاهزة لمفاوضات مش مباشرة مع اليهود عشان تبادل الأسر.ى .
■الداخلية اللي بغزة حكت انها جاهزة تأمن صلاة الجمعة والعيد وفش عندها مشكلة.
■قراصنة جدعان من غزة وتركيا هاجموا مواقع اسرائيلية عالنت وسكروهم .
■انسحبت كل الأجهزة الأمنية من مناطق شرق وجنوب القدس بعد قرار الرئيس انه وقف التنسيق الأمني.
■أربع بنات غرقوا ببحر خانيونس والدفاع المدني انقذهم وأمورهم تمام والحمد لله.
■اليهود اعتقلوا للمرة الرابعة مبارح سهيلة بكر وبنتها ايمان من جنين.
■الكوافيرات بلش موسمهم تبع العيد.
■الحلاقين زبطوا شبكات النت عشان الزباين ميزهوش وهو بيستنوا دورهم.
■الخضرة لسة رخيصة وسعرها ماشي حاله وفش حاجة سعرها غالي الا الفليفلة.
■الفراولة نزلت فجأة من اول وجديد عالسوق وقاعدة بتنباع الأربعة بمية.
■عادة توزيع الكعك عالجيران وكل الحارة تعمل مع بعض كعك شكلها انقرضت.
■مجموعة من السياسين بتأكد انه موضوع انه يكون انتفا.ضة جديدة مسألة وقت مش أكثر.
■
#في_الجمعة_الاخيرة من رمضان
#صباح_الخير لكل مظلوم ومقهور وموجوع ومعتر ومتعتر وحظه مش زابط معاه .
-صباح الخير لكل واحد مطلعلوش لا منحة قطرية ولا رئاسية ولا حمساو.ية ولا دحلانية ولا وقفة عز ولا مكتب عمل ولا حد قله وين انت ،اشكي أمرك ل الله ي خال.
-صباح الخير لكل أم صحت بناتها من الصبح تشطف وتغسل وتنظف السجاد والحمامات والحرامات والشبابيك والدرج والشعشبون وتغسل وجوه الفرشات وطقوم الصيني المتخبية وسدورة العزايم اللي بتطلع كل سنة مرة
-صباح الخير لكل أب شغال ليل بنهار عشان يجيب كسوة العيد وحلو العيد وكعك العيد ورنجة العيد وملبس العيد وفناجين العيد وصواني العيد..والله يكون بعونه وعيدكم سعيد وصلوا عالنبي بهذه الجمعة الأخيرة من الشهر الكريم 🌙🌹

ربنا يفرجها علينا
مشكور

شكرا لنقل والمتابعه

الله يعافيناا فعلاا كان يوم كارثة انه يكتشفوا هالعدد كله بيوم واحد
ومنيح انه بحالات محجورة
يعطيك العافية لادراجك ..

مشكور للمتابعة
ما ننحرم كل جديدك

آلله يعآفينآ من هالكرونآ
ويحفظ غزة ويحميهآ يآرب
شُكراً ع النقل أمير
مآ ننحرم