منتديات قلب فلسطين - أخبار_عالريق 166 ✅يكتبها/سعيد الطويل

#أخبار_عالريق 166
✅يكتبها/سعيد الطويل
■الجو اليوم حيقلب منخفض جوي بعد العصر ومطرة وريح وزوابع زي ما حكت الأرصاد والله أعلم.
■فش ولا حالة كوورنا جديدة بغزة وبالضفة اكتشفوا 8حالات جديدة مبارح.
■اليوم رواتب السلطة وفش قبضة الهم قبل العيد ،وب19خمسة في قبضة للوكالة بس قبل العيد.
■أبو مازن مدد حالة الطوارئ لكمان شهر جديد.
■ارتفع عدد اللي ماتوا عند اليهود من الكوورنا ل235 والاصابات فوق ال16ألف.
■تلتمية وستين (360) واحد من المحجورين بغزة روحوا بالسلامة مبارح ع دورهم وفش فيهم ولا حاجة،عقبال البقية.
■شكلها الناس الأكيلة صايرة تخطط منيح ومتشربش مية كثير قبل الفطرة عشان تقدح من هالنعايم.
■اليهود طابين اعتقال بالشباب والكوادر بالقدس من مبارح بشكل مش طبيعي.
■اليوم حتنصرف مساعدات جرحى وشهد..اء مسيرا.ت العودة بفروع البريد بغزة.
■اليوم عالساعة خمسة حيعلن الرئيس اجراءات جديدة لحالة الطوارئ.
■الدولار كل يوم بينزل سعره عن اليوم اللي قبله.
■المفتول حتكون أكلة يوم الجمعة الجاية بنص بيوت الحارة لأنه أم هاني حتوزعها رحمة عن روح أبوها الله يرحمه.
■النسوان مبطلات يحكوا بالجيزة والجواز هالأيام ،شكلوا انضرب الموسم.
■عاملين عرض ع فرشة تخت ب2800شيكل بمعرض مشهور بغزة.
■عروض العيد معظمها قديمة وفش ولا حاجة عليها العين .
■أم شادي بتقول لكنتها وهيا معها بالسيارة انه جارتها هويدة صايرة تخطط منيح وتجيب الها صحن الطبيخ كل خميس عشان يرجع يوم الجمعة مليان بحاجة دسمة ...تكتيك ي عمي 🙂.
■مارك طابب شفط وحذف بحسابات الصحفيين والناس النشيطة اللي بغزة.
■طار حسابنا وعليه 30ألف متابع وصديق من اللي بنحبهم وبيحبونا وأخذ بطريقة الإنتسجرام ..لو حابين تابعونا حتلاقوا الرابط بآخر النشرة.🙏

#صباح_الخير للصايمين والقايمين والقارئين واللي بيعملوا خير واللي بحبوا الخير وللناس اللي بتدل عالخير لو مش قادرة تعلمه.
-صباح الخير للمغتربين والمغتربات والطلبة الطالبات اللي بيستنى لحظة يروحوا فيها ع غزة.
-صباح الخير لكل مريض بيتوجع وقاعد بعيد عن أهله بمستشفيات القدس والضفة.
-صباح الخير لكل محجور بيستنى طلعة بالسلامة ليكمل رمضانه بجمعة أهله