منتديات قلب فلسطين - مفاهيم خاطئة !

#مفاهيم_خاطئة ⁦

١- الطفل لو جاع بعد ما يتولد و مامته تعبانه و مش قادرة ترضعُه :-

❌ الغلط :
إديله ٥ سم جلوكوز أو رضعة أعشاب لحد لما أمه تفوق ⁦... و كده كده اللبن مش هاينزل غير في اليوم الثالث..

⁦✔️⁩ الصح :
نساعد الأم و نحطه على صدرها لإن الحركة دي نفسها بتزود إفراز اللبن... لإن اللبن و القنوات اللبنيه بيكتمل تكوينها في ثدي الأم من الأسبوع ال ٣٥ في الحمل و مش محتاج غير تحفيز فقط ...
و الكمية اللي بتنزل للطفل كافية تشبعه لإن معدِته صغيره و يعادل حجمها حجم البيضة البلدي الصغيرة .... زائد إن أول لبن بينزل من ثدي الأم ( السرسوب ) على الرغم من إنه لونه خفيف و زي الماء إلا إنه بيحتوي على كمية عالية من البروتين و الأجسام المضادة اللي بتحمي الطفل لفترة طويلة ضد الميكروبات و الجراثيم اللي هايقابلها على كوكبنا الجميل 😊 ...و الأم لو مش قادرة خالص نحضر للطفل ٣٠ مل لبن صناعي و نديه بالمعلقة أو بالسرنجة علشان ما يتعودش على الببرونة و يسيب ثدي الأم ...

٢- الطفل لو جاتله الصفراء بعد الولادة :-

❌ الغلط :-
حطيه تحت لمبه نيون و إديله ميه بسكر علشان الصفراء تروح .

⁦✔️⁩ الصح :-
اللمبة النيون و لا ليها أي لازمة و لا تَمُت للعلاج الضوئي اللي الطفل بيتعرض ليه في الحضانة بِِصِلَة .... و الميه بسكر بتعمل عسر هضم و بتزود الصفراء ..... طيب نعمل إيه ؟؟!!
نِطلع بالطفل على أقرب دكتور نقيس عنده الصفراء بالذات لو ظهرت في أول يوم بعد الولادة .... و حسب النسبة و حالة الطفل الدكتور هايحدد هتعملوا إيه ....لو رجعكوا البيت و قالكوا دي صفراء فيسيولوجيه و نتابع يبقى تهتموا برضاعة الطفل كويس جداً لإنها أول علاج للصفراء الفيسيولوجية و تاني حاجه ممكن تعرضوا الطفل لضوء الشمس وقت الشروق و وقت الغروب لإن في الوقتين دول بيبقى في موجات ضوئية مشابهه للي موجودة في العلاج الضوئي اللي في الحضانات ...

٣- الطفل عنده فتق سُرِّي :-

❌ الغلط :-
أربطي بطنه بحزام السُرة أو أقولك هاتي جنيه معدن و اربطيه برباط على الفتق علشان يروح .

⁦✔️⁩الصح :-
الفتق السري موجود في نسبة مش قليلة من المواليد و سببه ضعف جدار البطن و مع الوقت في مُعظم الحالات مع نمو الطفل و ازدياد عضلات البطن قوة بيروح لوحده بدون أي تدخل مهما كان كبير .... و رباط السرة من فضلك فكيه و ارميه و الجنيه حطيه في الحصالة
يمكن ينفعك في يوم من الأيام 😄
و لو حسيتي إن الفتق جامد شوية أو لونه مغير و دا بيحصل قليل أوي ياريت تستشيري دكتور جراحة ...

٤- حفلة السُبوع :-

❌ الغلط :-
هاتوا الغربال نغربل الواد خلليه يجمد كده ...و دق يا هون و إسمع كلام أبوك و ما تسمعش كلام عمك ...( للأسف لسه بيحصل الكلام دا و كتير )

⁦✔️⁩ الصح:-
هزة الغربال ممكن تسبب نزيف في المخ فوريا و تخللي الطفل يعاني من إعاقة ذهنية و عصبية و عضلية طول عمره ...ف بلاش الغربال و بلاش السبوع أساساً التوفير حلو و إحنا في أيام ما يعلم بيها إلا ربنا 😄

٥- الكالسيوم :-

❌ الغلط :-
إديه من أول ما يتولد علشان يشد نفسه بدري و يمشي و يسنن بدري ...

⁦✔️⁩ الصح :-
مش بندي الكالسيوم من غير تحليل .... مش بندي الكالسيوم من غير تحليل .... مش بندي الكالسيوم من غير تحليل ... أقول كمان و الا كفاية 😄
ليه كل دا ؟؟!!
لإن الكالسيوم عمال على بطال و من بدري بيؤذي الكلى و ممكن يكون حصوات في مجرى بول الطفل و يدخلنا في متاهات لا طاقة لنا بها ...
طيب نعمل إيه ؟؟!!
ندي فيتامين د من اول الولادة ٤ نقط و لغاية سنة و دا كفاية مع الرضاعة و الأكل بعد كده لنمو الطفل و تطوره العضلي ... الطفل متأخر نروح للدكتور و نعمل التحاليل و الفحوصات اللازمة و نشوف إيه السبب ..
و بالمرة الحديد ممكن نبدأه من الشهر الرابع كجرعة وقائية بالذات لو الطفل بيرضع طبيعي و مع بداية الأكل لو الطفل بياكل و بيرضع كويس ممكن نستغنى عن الحديد خالص ...

٦- الأكل :-

❌ الغلط :-
إبدأي أكلي بدري علشان وزنه يزيد و يربرب كده ...

⁦✔️⁩ الصح :-
في علامات بتقولنا الطفل جاهز ياكل و الا لأ زي مثلاً إنه يصلب رأسه .. يتابع الناس و هي بتاكل و لعابه ينزل وقت ما يشوف الأكل ... و العلامات دي بنشوفها من الشهر الرابع للسادس و حتى لو شفتيها و بدأتي تأكلي لازم تعرفي إن مرحلة ما قبل السنة اللي بيزود الوزن زيادة صحيه هي الرضاعة و الأساسي في غذاء الطفل هو الرضاعة ... و الغرض من الأكل ما هو فقط إلا تجربة الأصناف علشان نشوف تقبله ليها و عنده منها حساسية و الا لأ .

٧- الماء :-

❌ الغلط :-
شربيه ميه الدنيا حر حرام عليكي ...

⁦✔️⁩ الصح :-
شُرب الماء بيبدأ من عمر ٦ شهور و الطفل بيوصله عن طريق الرضاعة سواء طبيعي أو صناعي إحتياجاته الكاملة من الماء ..

ليه مش قبل ٦ شهور ؟؟!!

علشان بطنه ما تتملاش على الفاضي و يشبع و بالتالي تضيع عليه رضعات مغذية و وزنه يقل و كمان علشان الكلى ما تتعبش ...
و لو لازم أوي و نفسك تشربيه ماء أو هتستخدمي أعشاب علشان الإنتفاخ يبقى من الشهر التاني و مش أكتر من ٦٠ مل في اليوم و بدون سكر أو عسل ...